屯門公園共融遊樂場係2018年尾即將啟用！

 

全港首個以「水」同「沙」為設計主題嘅屯門公園共融遊樂場，小朋友又多咗個盡情「放電」嘅好地方啦！有別於一般傳統遊樂場，建築署設計團隊希望建造一個無障礙、優質嘅遊樂空間，俾唔同年齡同能力嘅小朋友可以一齊玩，遊樂場分南北兩個部分，共7個主題區，等我地一齊了解下共融遊樂場嘅設計概念同特色啦！

 

推動共融遊樂　採納得獎設計

屯門公園共融遊樂場嘅設計概念源自「共融遊樂空間設計概念比賽」嘅優勝作品。比賽係由智樂兒童遊樂協會 (Playright)、聯合國兒童基金香港委員會及香港園境師學會，係康樂及文化事務署、建築署同屯門區議會嘅支持下係2015年舉辦。建築署採納了得獎作品嘅概念，再深化當中嘅設計！

 

(得獎作品)

 

南北園區 七大主題遊玩設施

北面園區：「荷花的寓意」

成個遊樂場分南北兩部分，一共七個遊玩主題區。北面嘅設計主題為「荷花的寓意」，以水中荷花為創靈感，帶出平等意念。場內三個主題區分別為「光影荷花」、「山丘地帶」和「音樂感官」，為傷健兒童提供唔同嘅康樂設施，包括玩水區、高高低低的小山丘區、彈床、音樂小玩意好似敲擊樂器同鼓等！

(傷健人士都適用嘅彈床)

 

南面園區: 「爬上爬樂」

南面園區嘅設計主題為「爬上爬樂」，以爬蟲動物為主題，靈感源自屯門公園內的爬蟲館，鼓勵小朋友與大自然互動。場地設有四個主題區：「爬蟲樂園」、「獵蛋樂園」、「旋轉地帶」和「感官地帶」。傷健兒童可按自己能力，攀越不同高度和類別的攀爬架、瀡滑梯、係沙池「掘蛋」、玩轉各類搖擺旋轉設施、觸感活動組件等。

 

(攀爬架高7米; 橋高5米)

(上咗沙嘅鱷魚)

 

度身訂做遊樂設施

 

一般遊樂場設計都會使用一式一樣嘅遊樂設施，但屯門公園共融遊樂場嘅康樂設施，係按場地實際環境度身訂做。園境師亦都花咗好多心思為遊樂場配置特別嘅植物，例如散發香味嘅含笑、成日俾大家誤會係楓樹嘅楓香、會旭嘅含羞草等，以增強感官刺激及拉近小朋友同大自然嘅距離！

 

(含笑)

(楓香樹)

(含羞草)

 

引入特色鞦韆

 

另外，建築署採納咗屯門區議會地區設施委員會嘅意見，新增咗個鞦韆區。除咗設置傳統鞦韆，亦引入三款特色鞦韆，包括：搖籃型、親子型及座椅型鞦韆。有別於傳統鞦韆，搖籃式鞦韆鼓勵小朋友同父母或朋友一同盪鞦韆，促進家長同孩子，或小朋友們間嘅交流。座椅型鞦韆則備有安全帶，適合行動不便或年齡較細嘅小朋友！

 

(搖籃型)

(親子型)

 

傷健人士適用遊樂設施

 

傷健人士嘅遊樂設施，原來背後亦花咗唔少心思！例如：佩戴人工耳蝸的聽障兒童係滑塑膠滑梯時會感到不適，所以設計團隊特別安裝一組不鏽鋼滑梯，照顧聽障兒童嘅需要。較低嘅滾筒式滑梯則讓行動不便嘅小朋友，一齊體驗瀡滑梯嘅樂趣！

 

(不鏽鋼滑梯)

(滾筒式滑梯)

 

另外遊樂場亦具備特別嘅設計，包括設置小隧道、矮牆同屏障，令自閉症兒童可以先遠離外界刺激，緩和不安感，再逐步熟習環境。

 

 

7個遊玩主題區︰「光影荷花」、「山丘地帶」、「音樂感官」、「爬蟲樂園」、「獵蛋樂園」、「旋轉地帶」和「感官地帶」

 

地址

屯門公園共融遊樂場

開幕日期：待定，約2018年11-12月

 

交通

港鐵屯門站B出口，行6分鐘通過屯門公園就到/ 經屯門輕鐵到市中心站落車行4分鐘

 

官方短片

 

延伸閱讀:

《全港親子單車地圖》第七集 - 新界西最大之屯門公園

《全港親子單車地圖》第十九集 – 清幽湖景之屯門湖山公園

《全港親子單車地圖》第十六集 – 天水圍休憩天地之天秀路公園

《全港親子單車地圖》第二十三集 – 香港人後花園之南生圍

 

Posted Date: 1/11/2016