親子單車地圖10 之賈炳達道公園

想同小朋友踏單車玩平衡車又唔知去邊玩好？ 全港親子單車好去處系列為各位家長嚴選全香港所有合適一家大細一齊踏單車玩平衡車嘅好地方。

 

今日同大家介紹吓位於九龍城嘅賈炳達道公園，係九龍寨城公園嘅旁邊！呢個公園嘅單車徑結集咗平路同埋唔同斜度嘅斜路，除咗比初學嘅小朋友練習亦岩曬技術較好嘅小朋友去挑戰。入面亦有緩跑徑、兒童遊樂場、長者健身站，岩曬一家大細黎Family Day啊！

多元化單車徑路段

呢到嘅單車徑以單程行駛，帶小朋友黎玩夠曬安全啊！單車徑有平路，好適合初學嘅小朋友黎學。同時亦有幾條唔同斜度嘅斜路，有上斜、落斜嘅地形，亦都有啲彎位，鍾意刺激嘅小朋友可以挑戰一吓！雖然單車徑有少少難度，但呢個公園勝在有清晰嘅道路標示，同時可以教小朋友注意道路安全，踩得安全啲啊！

圓形單車練習場

另外，公園仲有一個圓形單車練習場，地上有啲箭咀比小朋友跟住踩架！適合小朋友學習技術。同時技術較好嘅小朋友亦都可以係呢個練習場玩訓練繞圈技術，但記得一定要注意安全啊！

 

兒童遊樂練習區

但如果小朋友嘅技術未夠，建議去兒童遊樂區練習吓先，因為呢到嘅單車徑有較多嘅斜路，對初學者黎講有一定嘅難度，安全要緊，免得受傷啊！各位小朋友離開練習區之前都要記得留意返道路安全！園內亦有單車租借服務，大約$30至$40一個鐘，唔需要自己帶車都一樣玩得。

其他設施

賈炳達道公園亦有其他設施，包括一個7人硬地足球場、四個籃球場同兩個排球場，如果想玩其他球類運動都可以帶埋小朋友一齊去玩啊！呢個公園每日24小時開放，好方便！想幾時去都得啊！

交通

港鐵：樂富港鐵站A出口，步行約15分鐘；

巴士：1、2D、10、11K、85C、113；

小巴：25M、33

可自駕泊車（咪錶停車位）