親子單車地圖11 之西九海濱長廊

今日帶大家去西九文化區海濱長廊嘅單車徑踩單車﹗西九嘅海濱長廊長1.8公里，係一個以文化主題的「公共空間」。長廊上有草地同木板步行道；步行道沿海而建，長四百米，係全港最長嘅海濱木板步行道。沿住海旁踩單車可以欣賞到維多利亞港嘅海景，同時又有一片大草地，環境真係好舒服架！好適合一家人放假黎休息吓！

維多利亞港景致

大家沿住海旁踩單車或散步嘅時候可以觀賞維港兩岸景色，真係好正啊！

 

文化燈飾走廊

文化燈飾走廊由七十座四米高嘅三角形燈箱組成。燈箱上展示咗六十幾位本港畫家同書法家嘅創作，充滿文化藝術氣息。

 

木板步行道

係木板步行道上面將設有數以百計嘅手掌印模，比市民係掌印上簽名留念。呢個設計嘅意念，是將海濱交托比市民大眾，等市民大眾一齊參與美化維港，設計都內含意義架！

 

「悠遊西九」單車服務

西九文化區推出咗單車共享計劃，係海濱長廊向大家提供租單車服務！首先大家要去到單車站嘅客戶服務處登記，再以現金或八達通比錢。

智能卡：港幣 50 元 (包括 10 元不可退還之手續費及港幣 40 元儲值額)

收費：每小時港幣 20 元

為安全著想，建議大家戴上頭盔﹗如果猜冇帶頭盔可以去客戶服務處租借，費用為港幣 15 元。

租車程序：用智能卡輕拍上方單車感應器，單車解鎖後取回智能卡，並於 20 秒內將單車向後拉出使用。

而還車就可以到任何一個單車站還車，將單車泊入空嘅泊位就人得架啦！

單車站提供唔同尺寸嘅兒童單車，當中部份亦有配備輔助輪，配合唔同小朋友嘅需要。不過提提大家，單車只可以係公園內單車徑使用，所以唔好踩出外面啊！

 

海旁設施

西九文化區海濱長廊亦設有遊樂區、涼亭、緩跑徑、文化設施、咖啡廳、餐館同埋商店。除咗踩單車同散步之外，家長亦都可以同小朋友黎野餐﹗呢到有大草地比大家野餐，唔帶野食都緊要，因為可以到場再去小食亭購買，夠曬方便！

開放時間為上午7時至晚上11時，免費入場。

 

交通

港鐵：西鐵綫柯士甸站D2出口（步行約15分鐘）

東涌綫九龍站E4或E5出口抵達雅翔道，然後步行約十分鐘，經過行人天橋，便可到達西九文化區

巴士及專綫小巴：包括 8, 11, 203E, 215X, 207A 及 281A 號巴士以及 26, 74 及 77M號專線小巴，步行約十七分鐘

駕車： 因故宮博物館工程影響，西九文化區停車場暫停服務，駕駛人仕可停泊於圓方商場

 

鄰近商場兒童遊樂場值得一去

小編建議玩完西九文化區可以過去圓方商場行個圈。商場非常大，時裝、戲院、影音、日用品都有，一應俱全。

商場平台層有一個兒童遊樂場，入面嘅設施比較與眾不同呢。

例如E個360度轉嘅「跑步機」就比較特別，小心轉得過快小朋友客易趺倒！

又例如E個絕對係兒童安全版「攀石牆」。

特別版搖搖板等等。

 

開放時間

上午六時到晚上十時