好睇好食又好玩！

香港北區除左係水貨客集中地，其實重有好多地方未俾人「攻陷」。今次要介紹嘅路線絕對係好睇好食又好玩嘅路線！

 

港鐵站附近有單車鋪可作起點

由上水站A3出口出發，沿住行人路一直行，過左一條馬路見到馬會轉左直行就可以見到單車亭架啦！單車亭提供單車租賃、維修及買賣服務，店員更加非常用心為顧客介紹附近景點添！以下為單車亭提供之建議路線圖。

收費詳情如下。

大家出發前記得去定洗手間，準備定足夠飲料呀！沿住以上路線圖指示嘅單車徑一直踩，只需大約10-15分鐘就可以到達深港中心及救護站嘅位置。

沿途河景優美

沿住救護站旁邊嘅消防通道一直踩可以見到好靚嘅河景。

打卡熱點：大水管

沿途只有一個路口，入去就係好出名嘅大水管。大水管顧名思義係就係一堆嘅大水管，好多單車友都專程過黎E到打卡架。不過注意！水管都好高下，加上水務處有閘阻攔，千奇唔好好似小編咁打卡呀！

 

過左大水管就會見到橋，過左橋分叉口直去，行前兩步右手邊就係快景路。向前行100米左右就會到人稱「羅太」嘅就係荳品廠啦！

！！！$12豆腐花豆漿任飲任食！！！

$12豆腐花豆漿放題？！冇呃你，真係任飲任食！E間荳品廠位於快景路，雖然附近冇任何宣傳海報，但冇呃你！真係任飲任食！質素重要非常高！除左豆腐花豆漿之外「羅太」亦有飲品、食物甚至其他乾糧賣。淨係黎一轉都值回票價！

珍惜食物，勿浪費！

記得食得晒先好嗌！食唔晒會俾羅太教訓架！

食完野可以繼續出發~ 沿住入黎果條路原路出黎橋嘅分叉口轉左踩。

邊境關口一河之隔

一出到黎，對面河前方就係大家有所認識嘅羅湖商業城啦！

 

前路挑戰大 體力要求高 建議回程

由分叉口計算踩太約800米左右就會遇到一個鐵欄。小編建議年紀較少或者體力稍遜的小朋友到E到就好番轉頭，因為前路除左上落起伏非常多之外亦會需要踩行車路，對體能有相當要求。

 

邊境之最 德月樓警局

如果想挑戰多少少嘅朋友仔可以過左鐵欄後踩多500米到香港最北嘅邊境建築德月樓警局再回程，中間會遇到唔少牛群，大家要小心呢！

 

邊境一圈遊 *只適合體力佳嘅朋友

體力佳嘅朋友可以嘗試圍住邊境踩一圈，雖然小編拍攝當日有踩足全程，但就唔係到詳細介紹，有興趣可以參考頁尾路線圖及相片。

古色古香河上鄉

去到鐵欄就回程嘅家長可以沿住雙魚河落到去河上鄉遊覽。河上鄉入面除左有古色古香嘅建築物之外，亦有士多及商店可以補給一下。

豆美味豆花團係另一個任食豆腐花嘅熱點。加上有專線小巴來往河上鄉同上水站，所以河上鄉係非常受歡迎嘅熱點。

休息完可以出番雙魚河，你會見到有條相當新淨嘅單車徑。跟住單車徑一路踩，去到盡頭過橋就會去番開始時經過嘅救護站架啦。

 

家長亦可以自行選擇先去河上鄉參觀祠廟再去「羅太」到食豆腐花。將路線倒轉踩一樣得！

 

*注意

1. 量力而於，如打算挑戰踩足全程記得帶足夠飲料

2. 因太接近邊境，手機很大機會只接收到漫遊，出門記得同親友講聲！

 

建議路線圖

更多邊境一圈遊照片