親子行山樂第二集－新娘潭短程絕世靚景行山徑

發布者：由 Jollymap 發佈 - 2020-12-02T00:00:00.000+08:00 - 全港親子行山悠遊樂

新娘潭短程絕世靚景行山徑

想同小朋友去睇靚景，又唔想行咁遠山路？今日就帶你去新娘潭自然教育徑啦，成條教育徑長度唔超過1公里，有興趣仲可以行去睇埋絕世靚景－新娘潭瀑布、照鏡潭。沿路都會有唔少溪澗，小朋友可以喺部分水流唔急嘅淺溪澗玩下水，睇得又玩得，啱曬一家大曬一齊行。

出發

喺巴士站旁邊就有個洗手間同飲品售賣機，如果冇帶足夠嘅水都可以喺到買翻支水先再出發。洗手間對面就見到獅子亭，入口就喺旁邊嫁啦。大家要睇清楚個牌坊喺新娘潭自然教育徑，千其唔好行咗去對面嘅八仙嶺阿。

小知識

由入口落幾級樓梯就已經有野睇啦，第一條新娘潭橋就喺正入口。小橋流水，細心D睇仲可以發現到橋下面嘅壺穴。由於帶有沙石嘅溪水長年喺河床上面旋轉沖刷，久而久之就喺岩石上形成光滑嘅凹孔。小朋友可以喺呢到發掘下唔同嘅地理現象，為路程增添唔少樂趣。

沿路仲會有好多植物介紹牌，小朋友可以親身睇下植物嘅原生態，不過植物可能會因為季節嘅轉變，而同介紹牌上面嘅照片唔同，家長可以同小朋友一齊分辨下唔同嘅植物，教學相長。

一直沿呢條古色古香既卵石路行落去，因為石與石之間有半吋空隙嘅設計，等雨水流走，所以路面會凹凸不平，家長可能都要拖住小朋友一齊行。

戲肉：新娘潭瀑布

行大概20分鐘就去到分岔口，右手邊條小徑就喺行去睇新娘潭瀑布，認住個分岔口有個樟樹嘅介紹牌咁就唔驚行錯啦。沿路都會有兩條小路可以睇到小瀑布，再行入D就會睇到水濂比較闊嘅新娘潭瀑布。新娘潭位於船灣郊野公園，直徑有差唔多25米，深大概2米。望住瀑布傾瀉而下，小朋友可以喺周邊探遊或者靜靜咁坐喺到睇翻本繪本，聽住大自然碰撞嘅聲音，都市生活嘅忙碌都可以暫時忘卻。不過喺呢到都唔好落水玩阿，家長都要記得睇實小朋友，因為岩石可能被濺起嘅水整濕，好容易發生意外。

照鏡潭

睇完靚景原路出翻分岔口，繼續前行就會去到第二條新娘潭橋。喺橋前面就有個石牌指向照鏡潭，沿住樓梯上去，行大概5-10分鐘就可以去到照鏡潭。未見到照鏡潭之前，就已經可以同照鏡潭一瀉千里濺起嘅水花嚟個親密接觸。

照鏡潭瀑布雖然不及新娘潭瀑布闊，但喺高度達35米，氣勢磅礴。瀑布附近嘅石頭比較濕滑，家長同小朋友都唔好行得太埋呀。

沿路翻去，穿過燒烤場，就嚟到個水流冇咁急嘅溪澗，小朋友可以喺岸邊浸下腳，玩玩水，不過都要記得注意安全。最後，沿樓梯上去就到終點啦。

新娘潭由來

喺好耐好耐之前，有個新娘出嫁，經過呢段山路嘅時候，遇到山洪暴發，有一位轎夫滑腳，頂花轎就趺咗落個潭到，新娘就因此溺斃。後來為咗悼念呢位新娘，就將呢到命名為新娘潭。但喺依家大部分路段經政府修葺過，天氣好嘅時間去行都喺好安全嫁。不過落雨嘅時候，或者喺啱啱落完雨就唔好去行啦，因為沿路都會見到唔少溪澗，大雨嘅時候可能會引起山泥傾瀉或者喺山洪暴發，而且山路濕滑好容易發生意外。