一家大細鶴藪避暑之行

近年嚟，有唔少家長鐘意喺假日帶小朋友去親子露營，仲可以順便去附近嘅行山徑郊遊，親親大自然。今次Jollymap就介紹一個親子郊遊好地方俾大家，位於粉嶺嘅鶴藪營地喺一個熱門地點，裡面嘅設備相當齊全，附近設有家樂徑環塘而行、仲有燒烤場，最啱放假，一家人去戶外郊遊。

 

 

鶴藪水塘家樂徑路線

搭小巴去到鶴藪圍嘅涼亭落車，家長可以同小朋友喺到整頓下，搽下防曬再出發。不過沿途就冇補給站嘅，家長最好帶定啲食物同足夠嘅水先出門。

露營新手好去處－鶴藪營地

沿住鶴藪道向前行大概10分鐘就會見到露營地點，上去就會見到燒烤爐、檯、櫈、仲有晾衫架、洗手間、涼亭等等…… 呢到算喺中型嘅營地，設備亦都相當齊全，啱曬露營新手。去行山嘅朋友亦可以上嚟去個洗手間先繼續出發。

原路行翻出去，繼續斜坡上去。條路都唔算太斜，沿路仲有啲木凳，累嘅話都可以坐休息下，大概20-30分鐘就去到家樂徑嫁啦。家長可以鼓勵小朋友要堅持付出，就會有回報。呢段路就比較開揚，家長記得做好防曬措施啦。

水塘靚景

行完呢條彎彎曲曲嘅斜路，就見到鶴藪水塘嘅靚景，絕對值回票價。呢到依山傍水，好天嘅時候水面唔單止有綠樹嘅倒影，仲有藍天白雲，同小朋友閒聊家常，自然心情舒暢，亦可以增進親子關係。家長可以教育小朋友要好好珍惜我哋呢個咁靚環境，做好環境保護，下一代先可以繼續欣賞大自然嘅恩賜。

 

鶴藪水塘家樂徑悠遊行

睇到夠，就可以行入去鶴藪水塘家樂徑。由於成條家樂徑喺環塘而行嘅，所以可以選擇由左邊，或者右邊嘅路開始都得。但喺水塘右邊嘅路喺由大小不一嘅石頭鋪成，會高低不平。我哋建議大家由右邊嘅樓梯開始上山，會比較易行，冇咁易發生意外。家長同小朋友行嘅時侯都要小心啲啦。

行上水塘右邊嘅樓梯，就可以居高臨下咁俯視成個水壩，仲可以一覽水塘嘅全貌，喺唔同角度欣賞美景，又喺另一番滋味。家長亦都可以藉此教導小朋友要從多角度思考。

上完樓梯之後，雖然有部分嘅路崎嶇不平，但斜度唔大。而且綠樹林蔭，行起上嚟都好舒服。

據聞喺鶴藪有70種蝴蝶，蜻蜓都有成50種，溪流同水潭入面仲有面臨絕種威脅嘅香港鬥魚，家長同小朋友不妨細心觀察下。

一路跟住家樂徑嘅指示行，喺第二個分岔口左轉就開始落山啦。

 

小橋流水休憩位

落去就會見到小橋流水，旁邊仲有啲大小不一嘅卵石，小朋友可以行去水邊探索一下，對小朋友嚟講都喺一個有趣嘅體驗。

美景當前，家長不妨同小朋友一齊聽住流水聲，睇睇繪本，感受微風嘅輕撫。

行過屏風橋丶珠坑橋，沿樓梯上去就置身喺樹林之間，不妨同小朋友一齊細心感受一下呢到清新嘅氣息。

一路行，穿過竹林就會去到燒烤場。

由燒烤場出嚟，再沿住條寬闊嘅石屎路行翻出去就會見到水壩。家長同小朋友行嘅時候都不妨留意下水塘嘅動靜，分分鐘有意外收獲。

去到水壩，原路翻去鶴藪圍搭小巴離開就得嫁啦。

鶴藪水塘家樂徑交通資訊

港鐵粉嶺站C出口，轉乘52B小巴，去到鶴藪圍嘅涼亭落車

停車場：鶴藪停車場

 

其他資訊

長度：約5公里

時間：3-4小時