將軍澳市區瀑布 小夏威夷探秘

平時翻工唔得閒帶小朋友去戶外活動，放假又唔想去咁遠？想喺鄰近市區嘅行山徑都睇到靚景？今次Jollymap有好介紹，帶大家去小夏威夷徑睇瀑布。唔洗買機票，又唔洗穿州過省，就可以去到嘅小夏威夷。家長同小朋友就算夏天嚟都唔洗怕熱。

 

 

 

小夏威夷路線選擇

由於小夏威夷徑嘅起點同終點喺唔一樣，如果選擇井欄樹作為起點行去寶琳，大部分嘅路段都喺落山為主。如果比較鐘意上山路嘅家長，可以同小朋友選擇由寶琳行去井欄樹。鐘意嘅話來回行都得。今次Jollymap就會帶大家由井欄樹行去寶琳。

 

開始旅程

喺井欄樹落車之後，向西貢方向行，由前面嘅隧道過去對面。喺隧道沿左邊樓梯上去就會見到往澳頭村嘅指示，行入去。

 

去到停車場就會見到澳頭村同新地村嘅指示，喺呢到入去經過啲村屋之後，就會見到一條曾經用作引水道嘅小石橋。

 

行到去到分岔口就左轉，跟住小夏威夷徑嘅指示牌行，就會經過一段開揚嘅路段。

 

小夏威夷游泳場

繼續前行就會見到個已經被摧毀嘅水壩，大石上面鋪滿青苔，可以睇得出已經有一段時間。據說上世紀初，有商人喺附近興建麵粉廠，選擇喺將軍澳村後山興建水壩蓄水，引水至麵粉廠。後麵粉廠來倒閉，村民將廢棄咗嘅蓄水池改為小夏威夷游泳場，後來因為發生意外，就關閉啦。亦都喺因為咁，所以呢到叫小夏威夷徑。

 

小瀑布

再行前少少就會睇到另一道被摧毀嘅水壩，水流由缺口傾瀉而下，形成一個小形瀑布。旁邊有小道行到打卡位，可以由正面拍攝小瀑布嘅神態，家長可以同小朋友喺到影翻張相留念，但喺都要注意安全。喺小瀑布下面有小溪澗，瀑布嘅水緩緩流過大石，有好多家長都鐘意帶小朋友嚟呢玩下水，但喺都要注意安全呀。

前面有啲行山好少見到嘅藍色棋盤台，玩到攰就可以行到前面嘅休憩位坐下，飲啖水。仲可以睇下橋下嘅溪澗，同遠眺將軍澳嘅樓景。對住個咁有詩意嘅景，個人都會比較放鬆，不妨同小朋友睇翻本繪本，咁就更加容易吸收知識啦。

 

行過小橋之後，沿住小石路落山，行大概15分鐘就會去到十字路口。

 

蓮苑台瀑布

有興趣的話可以選擇右轉，沿澳頭方向行10分鐘，就可以睇埋蓮苑台瀑布。雖然唔喺由千里傾瀉而下，但蓮苑台瀑布一個個小瀑布層層遞上，聽住流水沖擊大石嘅聲音，安撫咗喺都市生活嘅急躁。自然嘅景象千變萬化，同小朋友一齊行山，正正可以同佢哋一齊感受呢份大自然帶來嘅美好。

睇完瀑布原路折返到十字路口，往將軍澳村方向落樓梯。直到見到一條有綠色欄杆嘅小橋，喺呢到唔好過橋，跟左邊樓梯落去。

行到禮穎路右轉到回旋處，左邊就喺寶康路，喺單車停泊處斜對面會有洗手間，如果小朋友急嘅可以喺呢到去咗先。

一直行落隧道就會見到有清晰指示行去寶琳港鐵站。

 

小夏威夷徑交通資訊

港鐵鑽石山站轉乘

巴士：91，92，91M，91P，96R，井欄樹站落車

或

港鐵彩虹站轉乘

小巴：1，1A，井欄樹站落車

 

其他資訊

長度：約3公里

時間：2小時