河背水塘郊遊出奇蛋

 

難得放假遇著好天氣，帶小朋友去戶外活動。想BBQ、露營、又想行山，唔知點簡好？今次Jollymap就介紹個可以一次過滿足曬3個願望嘅好去處。位於元朗嘅河背水塘，設有家樂徑環塘而行，最適合就喺同小朋友嚟睇水壩。附近仲有營地同燒烤場，最適合鐘意郊遊嘅家庭嚟呢到度過一個美好嘅假期。

 

 

河背水塘郊遊樂

以河背村村公所作為起點，喺出發之前家長可以帶小朋友去涼亭左邊嘅洗手間，有需要嘅話仲可以喺村公所後面嘅士多，做下補給。買完水同食物，之後就可以出發啦！

沿住涼亭右邊嘅路一直行，嚟到呢到指住去有機農莊嘅分岔口就左轉，一路沿斜坡行上去。雖然呢段斜路對小朋友嚟講喺一個挑戰，家長亦都可以藉此教導小朋友堅持同忍耐，沿途睇下山下嘅景色，都好快行到上去。但喺行嘅時候可能會有車經過，家長記得要睇實小朋友啦。

河背露營好去處

慢慢行，大概20分鐘就會嚟到露營地點。呢到嘅設備都幾完善，有水喉、有燒烤爐，旁邊仲有流動洗手間。家長可以同小朋友一齊喺到休息下，細心聽聽就會聽到水流聲。行過去露營地點前面嘅小橋就會見到一個小瀑布，不過記得唔好落水玩啦。

河背水塘家樂徑

喺露營地點旁邊就有指示牌上去河背水塘，沿途會經過有機農莊，一直上去就會見到河背水塘家樂徑嘅入口。

成條家樂徑都喺圍繞住水塘，而且沿途無任何分岔路，所以唔洗擔心盪失路。而且成條路都喺林蔭小徑，周不時都有風吹嚟，十分涼快。行到較開揚嘅位置仲可以用唔同角度睇到塘中嘅小島。

去到尾段嘅時候會穿過一個小竹林，感覺自己置身於武俠片場景入面，可能隨時有個大俠橫空出現，傳授你一招半式。

繼續行，好快就會去到主壩。如果咁啱撞到水位高嘅時候，仲可以睇到排水，睇住塘水由主壩沖瀉而下，真喺好壯觀。一邊喺宏偉嘅水壩，另一邊喺青山綠水。家長可以引導小朋友感受大自然嘅奧秘同我哋嘅渺小，好好愛護大自然。河背水塘喺水務署管轄範圍內最細嘅水塘。水塘喺60年代落成，為八鄉農民提供灌溉用嘅水。

喺水壩出翻嚟就可以原路翻到河背村公所。

 

河背水塘家樂徑交通資訊

你可以乘搭港鐵西鐵線，喺錦上路C出口轉乘71專線小巴坐到總站就得架啦！如果想快啲，你都可以組團喺錦上路坐的士，河背村村公所落車，車資都只喺大約$30。

 

其他資訊

齋行山嘅話由河背村出發，全程約5公里（約3小時行完）

家樂徑長度：約2公里 （約1小時行完）