親子行山樂第十七集－油塘後花園探遊歷史古跡

發布者：由 Jollymap 發佈 - 2020-12-17T00:00:00.000+08:00 - 全港親子行山悠遊樂

油塘後花園探遊歷史古跡

放假想帶小朋友去行山，但又唔知有咩路線適合小朋友？Jollymap精選全港適合親子嘅行山路線，等小朋友以大自然為師，擺脫刻板學習模式。小朋友好奇心旺盛，鐘意周圍發掘唔同嘅野。最啱帶佢地去到唔同嘅地方，等佢地親自探索。

鬧市中的魔鬼

唔好以為行山就一定要去新界郊區，其實有唔少輕鬆嘅親子行山路線就喺市區。人稱魔鬼山嘅炮台山，就位處於油塘，喺港鐵站行過去都只喺需要大概20分鐘就可以上山啦。之所以被稱為魔鬼山，並唔喺因為地勢險要，而喺因為呢一帶以前海盜肆虐。由於魔鬼山山頂景觀開揚，腳下就喺維多利亞港東面水道入口，地理位置優越。後來，英軍喺到興建炮台，成為守護維多利亞港嘅軍事要點，所以又叫炮台山。依家去到魔鬼山，仍然可以一覽當年遺留落黎嘅軍事遺跡。

登山前遊鯉魚門

唔想齋行山咁悶？可以同小朋友喺油塘行過去鯉魚門，感受下避風塘嘅氣息。以大本型作為起點，出發前可以喺商場嘅便利店做一啲準備，帶足夠嘅水同食物。記得提一提小朋友去埋洗手間。萬事俱備，就可以出發啦。

由大本型近油塘社區會堂嘅出口出嚟，過馬路轉右，到茶果嶺道左轉，一路向鯉魚門體育館方向行，見到鯉魚門嘅牌坊就已經到達三家村避風塘。行入避風塘，左轉行入去。沿岸海鮮酒家林立，鯉魚門對於吃貨嚟講簡直就喺食海鮮嘅勝地。如果時間充足，大家不妨先食翻餐海鮮大餐，先再起程。

亦可以直接穿過呢啲海鮮酒家，喺沿路嘅傳統小食店買些少豬肉乾、雞仔餅，等小朋友上到山頂作為獎勵。

終於走過一堆美食嘅誘惑，沿岸邊一直向前行，就會嚟到上山前最後一個洗手間，最緊要提小朋友去定個洗手間，因為之後上山就冇洗手間啦。

行到路嘅盡頭你會見到天后古廟，難得行到呢邊，可以喺到幫小朋友影翻張相留念。

登山小挑戰

喺天后古廟前有分岔口，只要留意地面前住衛奕信徑嘅標記，跟住呢個標記就可以進入衛奕信徑第三段，咁就唔洗驚行錯路啦。一路只要沿樓梯上，喺分岔路口，跟住衛奕信徑的指示牌行，就可以上到馬路。呢段路以樓梯為主，小朋友行可能會有少少辛苦，不過沿途有唔少樹蔭，可以隨時停低休息。偶爾回頭望下，亦可以欣賞到腳下嘅風光景致。

魔鬼山－歌賦炮台

上到馬路左轉，直至見到條長樓梯，就可以正式登上魔鬼山。

上樓梯之後，向左邊行大概200米見到分岔路，轉入去就到達魔鬼山嘅歌賦炮台。入到去就見到個凹位，被樹陰遮蓋，就喺當年嘅彈藥庫。

旁邊嘅炮床早於1898年已經建成，以作防守維多利亞港之用。但由於調防關係，炮台嘅兩座大炮喺20世紀初已經被移到其他地方。1941年香港保衛戰，炮台喺醉酒灣防線嘅一個重要據點。當年戰況非常激烈，直到現時，當年嘅彈孔仍然清晰可見。歌賦炮台現時喺二級歷史建築，遺跡嘅保留不單單喺提供一個空地俾小朋友遊玩，小朋友亦可以親身踏足古跡，加深對香港歷史嘅認識。炮台旁邊有一個休憩亭，可以喺到飲啖茶食個包，養足精神再上山頂。

離開歌賦炮台，折返到分岔口跟住炮台山方向行，沿途可以駐足欣賞鯉魚門嘅風光景色。要上到山頂就一定要挑戰一條長樓梯，但喺都物超所值，上樓梯嘅時候只要一回頭，山下嘅景色就一覽無遺。觀察力敏銳嘅小朋友可能仲會留意到旁邊嘅暗道，喺戰時遺留落黎嘅戰壕，通訊人員就喺靠戰壕掩護，阻擋迎面而來嘅炮火，由山頂走落炮台。不過由於樓梯只得一邊有欄杆，上樓梯嘅時侯就要注意啦。