親子輕鬆漫遊鷹巢山

想帶小朋友去戶外活動，又怕曬親佢哋？今日Jollymap為大家介紹位於石梨貝水塘附近嘅鷹巢山自然教育徑。成條行山徑環繞鷹巢山行一圈，所以大部分都喺平路，而且有樹遮蔭。平時少運動、怕曬嘅朋友都唔洗驚。小朋友可以接觸大自然，同時又可以喺教育徑認識到自然環境。

 

 

馬騮仔會上橋

平時去馬騮山就會搭到去到石梨貝水塘落車，去鷹巢山自然教育徑都喺一樣。

 

巴士站旁邊有洗手間，同補給站，有需要嘅家長可以喺到整頓完先再出發。

 

落車就會見到條行人天橋，行過去就會見到去鷹巢山嘅指示牌，沿途嘅指示都好清晰，所以唔洗驚唔識路。喺天橋上面會有唔少馬騮，一家大細坐定定喺到，得正正喺到，乜都唔駛做。

 

雖然馬騮仔好得意，但喺家長都要記得提同小朋友要將食物收好，因為馬騮仔喺好聰明，睇到有食物可能會搶嫁。同時，都要記得唔好餵馬騮，咁樣可能會令到馬騮數目過多，對遊人做成滋擾。家長都要記得睇實小朋友唔好同馬騮走得太近。

落咗行人天橋就嚟到獅子山郊野公園門口，喺到行入去，大概3分鐘就會見到鷹巢山自然教育徑嘅入口就喺左手邊。

 

開始征途

喺入口由左邊嘅樓梯上，就已經置身喺樹林入面，陽光由樹嘅縫隙射照到路上，睇到都令人覺得心情舒暢。

 

路途中都會有唔少簡介牌，介紹呢條行山徑嘅植物生態。家長可以同小朋友一齊認識下大自然嘅生態，以大自然為師，學習都學得心情舒暢啲。

 

行行下仲會見到介紹沿途景色嘅牌，家長可以同小朋友一齊認識下香港嘅地理。前半段路仲周不時都可以睇到當年新界第一個水塘－九龍水塘。

行嘅時候，時不時會聽到啲馬騮喺樹上跳嚟跳去嘅聲。如果好彩嘅話，喺路上可能仲會見到馬騮模特兒，擺好Pose等你幫佢影靚相。細心留意嘅話仲會睇到有馬騮媽媽同馬騮仔互相捉蝨，場面相當溫馨。小朋友可以從觀察動物中學習到動物嘅習性，同動物和平相處。

 

望望靚景

繼續環山而行，去到分岔口，就沿指住往教育徑方向嘅樓梯上去，上面有個涼亭可以睇到九龍半島一帶嘅樓景。家長可以同小朋友喺到飲啖茶食個包，望望靚景。住附近嘅仲可以睇下搵唔搵到自己屋企喺邊。

休息完之後，就沿教育徑指示開始落山。穿過啲巨石陣就去到個更加開揚嘅位，可以喺到用另一個角度欣賞九龍半島。旁邊有幾嚿大石，石上面留有途人題嘅詩，不過部分已經被擦走。家長同小朋友行山嘅時候都唔好塗鴉，仲要記得教佢哋將垃圾帶走，愛護大自然。如果對住眼前美景，有所頓悟，不妨喺到同小朋友輕輕鬆鬆咁睇翻本繪本。

離開呢個咁開揚嘅位置，向九龍水塘方向一路落山，間唔時睇到九龍半島一帶嘅景色。由於山邊喺冇欄杆嘅，家長要記得睇實小朋友，唔好奔跑呀。

 

嚟到最後一個分岔口都喺沿教育徑指示就可以翻到去起點嫁啦。成程嘅指示都相當清晰，而且路程易行。出翻去獅子山郊野公園門口就可以搭巴士離開啦。

 

鷹巢山自然教育徑交通資訊

巴士：72、81或86B巴士，喺石梨貝水塘站落車

停車場：大埔公路－琵琶山段停車場

 

其他資訊

長度：3.2公里

時間：2-3小時