親子行山樂第十五集－ 360度玩轉昂坪奇趣徑密密睇

發布者：由 Jollymap 發佈 - 2020-12-15T00:00:00.000+08:00 - 全港親子行山悠遊樂

360度玩轉昂坪奇趣徑密密睇

相信唔少家長都有試過帶小朋友去昂坪睇天壇大佛，唔知去昂坪行山大家又試過未？去昂坪唔一定淨喺可以食齋睇大佛嘅，今次Jollymap帶大家玩盡昂坪。昂坪奇趣徑位於大嶼山西南部，周末假期喺唔少家長都會選擇嘅親子好去處。沿路經過心經簡林，仲有一條特別多植物品種介紹嘅研習徑，行嘅時候仲可以睇到雲霧飄緲嘅鳳凰山，而且大部分路程平坦，大人細路都啱行。

昂坪奇趣徑路線

以南天佛國呢個牌坊作為起點，喺旁邊就有洗手間，家長可以同小朋友去咗先出發。

沿住昂坪路向天壇大佛方向行，旁邊都有士多，有需要嘅話都可以喺到做下補給，又或者食下豆腐花先再起行，有唔少旅客都會喺到停留，一嚐香港風味。

天壇大佛打卡點

前面就喺行上去天壇大佛嘅樓梯，亦都喺欣賞大佛嘅最佳位置。大家可以感受一下呢座咁宏偉壯觀、氣勢磅礴嘅大佛，又或者同小朋友影翻張相，記錄親子時光。

樓梯旁邊嘅分岔口就有去心經簡林嘅指示牌，行入呢條寬敞嘅路，鳥語花香，加上小朋友喺身邊嘅嬉笑聲，樂也融融。

行嘅時候留意右邊有一條小道，行入去就進入咗一個小樹林。

舊日屋園茶舍

穿過呢條小道之後就左轉，經過茶園餐廳，不過周圍嘅屋舍已經荒廢咗，只喺留低咗一啲破爛嘅台、凳，仲有之前嘅生活痕跡。

前面就會見到分岔口，喺呢到無論向左走，定向右走都可以，因為昂坪奇趣徑喺一條環迴路徑，最後都會翻到嚟呢到。

鳳凰飄緲

鐘意將驚喜留在後頭嘅小編選擇由左邊開始，行上斜坡，穿過小樹林之後，只要一抬頭就見到右邊嘅鳳凰山被雲霧圍繞，一層薄霧雖然看似一直隨風流動，但久久未能散去，話唔定仲有一對神仙眷侶住咗喺上面，鐘意睇神話故事嘅小朋友見到呢個景一定好有代入感，亦都可以培養小朋友嘅想像力。睇耐咗心裡面嘅浮燥都好似輕咗唔少，家長可以引導小朋友學識靜心去觀察周圍嘅環境。

繼續向前行就去露營地點，家長可以同小朋友行入去休息下，飲啖茶，食個包，補充完體力先再出發。

樹木奇趣徑

營地入口旁邊有樹徑考趣同心經簡林嘅指示牌，行入去就會見到好多平時好少見嘅植物種類，好似光葉山礬、九節、米碎花呢啲都喺稀有品種嘅植物嚟嫁。仲有一啲聽落去都唔似喺植物名嘅品種，好似老鼠刺、黑面神、木薑子、石斑木等等……由於昂坪喺高原，長年都潮濕有霧，土地肥沃，野生植物品種繁多，幾乎每行10步就有一個植物嘅介紹牌，對好奇心重嘅小朋友嚟講，呢到都喺一個有趣又學到野嘅好地方。