地質奇觀暢遊橋咀島

放得一日假，想同小朋友去行下山，出下海，都有好多選擇嫁。今次Jollymap就同大家嚟翻個上山下海嘅親子遊。小朋友精力無窮，最啱就喺帶佢哋出去戶外活動，唔單止可以鍛鍊體能，又可以同佢哋一齊喺大自然上翻一課教育堂。

 

 

小島遊

今次我哋出發去位於西貢嘅橋咀島，唔單止可以睇到連島沙洲嘅奇景，就連世界地質公園都喺裡面，而且水質仲長期喺一級良好狀態，所以吸引好多家庭同遊客過嚟行下山，又玩下水咁。

 

街渡體驗

要去橋咀島都相當容易，只要喺西貢搭十幾分鐘街渡就去到嫁啦。坐喺船上面，望住被陽光灑上一層金箔嘅海面，金光閃閃，睇住周圍群山起伏，連綿不斷，偶爾仲經過一啲小島，十分寫意。

 

連島沙洲奇景

去到橋咀島，如果水位唔高，一落船就見到右邊遠處嘅連島沙洲，為遊人鋪設一條步道行去孤島，而潮漲嘅時候就變成兩個獨立嘅小島。所以去嘅時候都要記得睇咗潮汐時間先，免得錯過咗奇景。

 

由浮台行出嚟，喺左手邊就見到橋咀泳灘，裡面仲有燒烤場，家長都可以選擇過嚟呢邊BBQ。玩到累都可以過嚟呢邊嘅小食亭補充能量，有需要的話都可以喺旁邊嘅設施沖洗一下。

火山岩奇觀

由橋咀泳灘行翻出嚟，就見到岸邊有一堆石頭，唔好以為一堆石頭就冇乜睇頭。呢一啲岩石喺白堊紀早期，即喺1 億4000萬前，香港火山爆發嘅時候所形成嘅。家長可以同小朋友一齊辨認下唔同嘅岩石。好似呢啲大大嚿，又好多棱角嘅就喺火山角礫岩，仲有流紋岩、沉凝灰岩等等……

 

而橋咀島仲有一樣名物－菠蘿包，行過去沙洲就可以搵到啦。佢哋喺已經有成好多好多年歷史嘅菠蘿包，大家記住再肚餓都唔好食咗佢呀。佢哋嘅學名就喺叫石英二長岩，表面果啲就喺礦物結晶嚟。

 

地質公園探秘

沿沙洲行過去就去到地質公園，呢個連島沙洲由唔同嘅石砌成，小朋友喺上面走嚟走去一定覺得好有新鮮感，仲可以行去水邊玩下，清澈嘅海水將小石頭覆蓋，睇到都覺得清涼呀，小朋友仲可以掉下石頭，樂趣無窮。

 

穿過沙洲，行上一條綠意盎然嘅樓梯，就即刻進入山林。

大概15分鐘就去到一個開揚嘅位置，喺到居高臨下咁飽覽清水灣半島同牛尾海嘅美景。

 

石灘親子行

睇完靚景休息翻陣，繼續行落去，就嚟去到呢個超靚，又比較少人嘅石灘。小朋友可以喺石頭上周圍探索一下，去到淺水嘅地方仲可以搵下有冇寶物。鐘意嘅話仲可以喺到疊下石頭，對小朋友嚟講好玩又有挑戰性，不過就記得唔好帶走啲石頭啦。大家仲可以挑戰下行唔行到去座白色嘅青洲燈塔果邊。

 

對住呢個靚，坐喺大石上面，一陣陣微風舒服咁吹喺臉上，發下呆，睇下繪本，咁就最適合不過啦。有唔少人都鐘意過嚟呢邊釣下魚，睇下書嫁，同小朋友輕輕鬆鬆咁喺到玩一日，好不寫意。多啲同小朋友出戶外玩，仲可以增進親子關係，同培養佢哋嘅獨立性。

雖然喺呢個小島上面好舒服、寫意，但喺都要記得睇時間。如果潮漲，沙洲消失咗，就要留落荒島啦。所以家長記得要留意潮汐時間啦。

 

玩到夠，就原路翻去。不過提提大家，如果啱啱落完雨，小島嘅山路會比較滑，大家要注意啦。

翻到去橋咀島，仲可以喺到玩下水，玩下沙先走。

最後搭翻街渡翻西貢就可以啦。

 

橋咀島交通資訊

乘搭港鐵到彩虹站，由AC2出口乘搭

小巴：1A 或

巴士：九巴91、92、94、96、99、299X ，新巴792M

去到西貢總站落車

再喺西貢碼頭搭街渡去橋咀洲（費用約＄30）

 

其他資訊

長度：行去西貢火山岩園區來回約1公里

時間：1小時