親子單車地圖13 之迪欣湖

 

想同小朋友踏單車玩平衡車又唔知去邊玩好？ 全港親子單車好去處系列為各位家長嚴選全香港所有合適一家大細一齊踏單車玩平衡車嘅好地方。

 

今日唔係帶大家去迪士尼樂園，而係迪士尼附近嘅迪欣湖！迪欣湖活動中心位於香港大嶼山嘅竹篙灣，由迪士尼公司管理，係一個面積好大嘅人工湖！

黎到呢到真係好似去咗世外桃源啊！大家迪士尼就去得多啦，不如今次去迪欣湖欣賞吓風景，一齊輕鬆一吓啦﹗而且迪欣湖平日唔太多人，所以玩起黎都幾舒服架。

 

全港最大人造蓄水池

迪欣湖面積達12公頃，佢一啲都唔簡單架﹗迪欣湖同時係香港最大嘅人造蓄水池黎架，雖然係人造水池，但池內種植咗荷花、紅睡蓮等嘅水生植物，亦設有人造噴泉、人造瀑布，真係好正﹗呢個湖更係提供水源比竹篙灣發展區，包括香港迪士尼樂園，作灌溉之用。

 

單車徑圍繞整個迪欣湖

呢到嘅單車徑嘅設計係圍繞成個迪欣湖架，中途亦可以踩去植物園，沿路再踩返出迪欣湖，踩嘅同時欣賞迪欣湖嘅美景。

可租借二人/四人單車、水上腳踏船

家長亦可以選擇到場租借二人/四人單車、二人/四人水上腳踏船，不過數量不多，而且價錢較貴，二人單車每小時$100、四人單車每小時$120，而二人水上腳踏船則每小時$120、四人水上腳踏船每小時$150，家長可以自行考慮係迪欣湖租車抑否自己帶單車。

 

人造瀑布

人造瀑布係迪欣湖嘅東北部，以人造石景同埋天然石岩製造，成條瀑布係由7個小池潭流下嘅溪澗組成。

 

植物園

迪欣湖入面有條路可以踩去植物園，植物園面積達4公頃，植有超過一千株植物，包括果樹、玫瑰及馥郁等植物。

 

草地野餐

迪欣湖周圍都係草地，同小朋友黎野餐都係一個唔錯嘅選擇。活動中心入面有便利店，如果唔想帶食物入黎可以係便利店即時買，便利店外設有桌椅，有蓋可以野餐，真係十分方便！

 

其他設施

路上沿途六設有9個健身站、6個觀景亭。而且係迪欣湖活動中心入口外更設有兒童遊樂場，小朋友都可以係到玩！

 

開放時間

每天早上9時至晚上7時，免費開放。

 

交通

於迪士尼站乘搭前往迪欣湖活動中心R8巴士，需大約5分鐘。

或由迪士尼步行到迪欣湖，需大約15分鐘。