親子單車地圖3 之沙田交通安全公園

 

 模擬香港真實道路環境

「交通安全公園」？ 點解個名咁得意嘅？其實呢個位於沙田河畔花園嘅單車公園係一個模擬香港真實道路環境嘅公園，入面周圍都設置咗好多路牌以及仿馬路嘅設施，例如係雪糕筒、紅綠燈、迴旋處同埋安全島，就連入面比單車踩嘅車路都係仿照真實馬路設計，好真實好得意架。

因為呢個公園係為小朋友而設，所以有部份設施係按比例縮細，亦有一個仿真行人天橋，好迷你好得意架。家長可以帶小朋友入去踩單車，比小朋友感受一吓真實路面嘅樂趣！玩嘅同時可以教導佢哋有關交通安全嘅知識，提醒小朋友注意安全！咁就可以寓學習於娛樂啦！不過要注意嘅係呢個公園唔可以踩大人單車架！

 

其他休憩用設施

另外，呢個交通安全公園亦都設有其他休憩用嘅設施，園內有一座涼亭，玩到攰嘅時間家長可以帶小朋友去涼亭休息吓。而且公園入面都有提供免費刊物，休息個陣都可以睇下書。涼亭旁邊亦都有一個專比小朋友停泊單車嘅地方。

 

而公眾洗手間以及飲水機就位於園內嘅辦事處，就係呢個形似積木嘅建築物。炎炎夏日，玩嘅同時記得要飲多啲水補充水份啊！唔係嘅話好易唔舒服會中暑架！

另外，沙田交通安全公園位置鄰近屋邨，附近有好多食肆，踩完單車去搵野食亦都非常方便架！

交通

巴士：沙田交通安全公園鄰近「沙田圍」巴士總站，可以乘搭86A或者89B巴士直接到達

馬鐵：在沙田圍下車再在C出口行5分鐘

鄰近亦有泊車位以屋邨停車場，方便駕駛人士。不過提醒大家園內沒有單車租用服務，需要自行攜帶單車。

沙田交通安全公園開放時間為每日早上8時至晚上11時。