親子單車地圖7 之屯門公園

Posted by Jollymap - 2020-12-07T00:00:00.000+08:00 - 全港親子單車地圖

想同小朋友踏單車玩平衡車又唔知去邊玩好？全港親子單車好去處系列為各位家長嚴選全香港所有合適一家大細一齊踏單車玩平衡車嘅好地方。

各位新界西人請注意啦！今集我地會同大家介紹新界區嘅大型公園：屯門公園！屯門公園位於屯門區市中心，鄰近屯門大會堂、屯門公共圖書館同埋西鐵線屯門站，非常方便住係新界西嘅朋友仔去親親大自然啊！

大型綠化休憩園地

屯門公園佔地約12.5公頃，係一個大型綠化休憩園地，園內種植超過2000棵樹木同10萬株灌木，約有200個唔同嘅植物品種，位於園內多個植物專類園。亦有多個康樂設施。

河畔長廊單車徑

單車徑起點位置鄰近屯門站C出口，家長亦可選擇先到單車徑踩單車，之後再去公園玩其他設施。單車徑係一條直而平坦嘅路，同緩跑徑並行，難度較低，都幾適合新手去踩架。單車徑旁邊就係屯門河河畔長廊，沿住河畔可以一邊望住靚景一邊踩單車，真係一流！不過小心啲唔好踩咗過去緩跑徑啊，要注意安全。

模型船池

公園亦都有一個大型人工湖，佔地約一公頃，景色優美。人工湖旁邊亦有模型船池，平日都有唔少模型船愛好者係到玩架！如果家長有模型船就記得帶埋黎玩啦。模型船池開放時間為每日上午7時至下午11時（包括公眾假期）。

另外，係人工湖的湖心島上，亦有一個快餐亭，可前往購買小食以及飲品。

爬蟲館

公園南面嘅草地有一個爬蟲館，免費入場架，爬蟲館的設施包括室內展覽缸及露天展覽場，展出唔同品種嘅爬蟲類動物。爬蟲館有多種活展品，包括地氈蟒、傘蜥、南美蚺、鼻鱉、黑池龜等等，記得一定要帶小朋友去參觀吓啦！認識爬蟲類動物！不過小心唔比大蟒蛇嚇親啊！爬蟲館開放時間係每日上午9時至下午6時（包括公眾假期），記住要注意時間啦。