親子單車地圖9 之科學園

高科技及應用科技為主題研究基地

科學園位於吐露港沿岸，係香港其中一個以高科技及應用科技為主題嘅研究基地，因此科學園亦大力推廣綠色低碳生活。除左園內使用大量潔淨能源之外，單車及電動車亦係科學園最鼓勵使用嘅交通工具，所以園內隨處都有停車停泊處、單車徑及電車充電站等環保設備。

全長超過二十公里

大家都知道科學園嘅單車徑連接沙田到大埔，全長超過二十公里，難度相當高。叫得做親子單車地圖，我地當然為大家嚴選最適合親子嘅路線！

 

大學站出發至科學園

今次介紹路線由大學站出發踩到科學園。好處係交通方便之餘，租車亦較為方便。加上路程較短、難度較低及沿路都係單車徑，無需過馬路及上行人路。由大學站開始只需大約15-20分鐘就可以到達科學園。

 

海濱長廊

當你進入科學園範圍會見到隔離就係海濱長廊，對出就係吐露港嘅超級無敵大海景！注意海濱長廊範圍唔可以踩單車架！

大量食肆及便利店

科學園入面有大量食肆及便利店，甚至有今年最熱嘅美食車添！部分園內食肆更以兒童遊樂場為主題，有得食又有得玩！

 

大量打卡熱點

除左食同玩，科學園內外都有大量打卡熱點架。例如「金蛋」就係科學園最具代表性嘅地標。「金蛋」正名為高錕會議中心，標誌著「孵化」創意及激發靈感。除左「金蛋」之外，園中嘅噴水池更加係影婚紗相嘅熱點。踩遠少少去到白石角梯台更加係不得了嘅打卡位，既望到對岸三門仔嘅海景，又望到馬鞍山恆安嘅樓景，淨係睇兩張相真係唔夠，一定要親身感受一下。

交通

港鐵： 乘火車到港鐵大學站。