西貢紅樹林仙境 民俗生態遊

香港大大話話有成60幾個紅樹林。紅樹林喺一個獨特嘅生境，當中有唔少獨特嘅植物同生物，都喺一個非常唔錯嘅親子好去處嚟嫁。小朋友可以從中認識到大自然嘅生態，喺紅樹林裡面嘅泥澤搵下唔嘅生物，唔單止可以培養小朋友愛護大自然嘅意識，仲可以培養佢哋嘅觀察力。今次Jollymap推介一條非常易行嘅行山徑，沿途仲可以睇到紅樹林、上窰民俗文物館。

 

 

 

北潭涌自然教育徑路線

北潭涌自然教育徑位於西貢東郊野公園。以北潭涌巴士總站作為起點，喺出發前可以去巴士站前面嘅西貢郊野公園遊客中心遊覽一番，裡面除咗講解咗郊野公園嘅發展歷史、傳統嘅鄉村習俗，仲有一個海洋保護展區。小朋友可以喺裡面學到唔同嘅小知識嫁。

睇完就可以出翻去附近嘅小食亭買下水同食物，仲要記得帶小朋友去埋洗手間先再出發。

 

沿大網仔路向鯽魚湖方向行，大概5分鐘就會見到發記士多，北潭涌自然教育徑嘅入口就喺士多嘅旁邊啦。

 

 

開啟大自然的奇妙旅程

踏上北潭涌復興橋，喺橋上遠眺兩邊嘅景色，完全喺另一種感受，真真正正感受到回歸大自然。即使望向遠處都喺一片青山綠水，而唔喺高樓大廈，令人更加期待之後嘅路程。家長同小朋友可以喺到慢慢欣賞同感受自然嘅美態，切切實實嘅心靈感受令小朋友更易記住大自然嘅美好。

 

過咗橋就轉右，前面有個小缺口，可以到睇到出面嘅河景，微風吹動岸邊嘅植物擺動，喺水面泛起一圈圈璉漪，可以同小朋友一齊分享咁美好嘅時間，真喺好寫意。

 

 

呢到嘅水都幾清澈，家長亦可以同小朋友喺到睇下水中嘅生物，呢到潮退嘅時候，部分河床會露出水面，有好高生態價值嫁。

 

 

香港紅樹林生態遊

再行前少少就會見到一片紅樹林，由於呢到嘅泥灘成日俾海水淹蓋，鹽分高又缺氧，部分紅樹透過落葉嚟減少樹體嘅鹽分，而生出嚟一支支好似筷子咁嘅樹根，就喺用嚟幫助紅樹吸收更多嘅養分。家長可以同小朋友喺到睇住介紹牌，搵下紅樹林嘅特性，親身見聞可以令小朋友留低深刻嘅學習印象。

沿住教育徑行嘅時侯可以喺樹叢之間睇到出面嘅河流，同對岸嘅北潭涌渡假營。行嘅時候仲周不時都會見到蝴蝶成雙成對咁喺身邊飛過。

沿途都有唔少介紹植物嘅牌，好似黃槿、露兜樹、秋茄樹，呢啲都喺紅樹林常見嘅植物。

 

上窰村舊日古蹟

行大概15分鐘就會見到上窰村嘅法定古蹟。見到一個被圍住咗嘅洞嘅時候，唔好以為呢個喺一個普通嘅洞，佢喺灰窰嚟，外面鋪有砌石加固，以前嘅村民喺海底提取珊瑚同貝殼之後，會拎嚟呢到整成石灰。

前面就喺上窰民俗文物館，裡面有一排並列嘅房舍，屋前嘅空地其實喺曬坪嚟。家長可以同小朋友入去上窰民俗文物館參觀，裡面擺放左昔日嘅日常用品，不妨一齊入去了解下上窰昔日嘅鄉村風貌。但上窰民俗文物館星期二會休館，想去睇嘅家長就要注意啦。

 

文物館出面有個舊碼頭，以前嘅居民就喺靠呢個碼頭往返西貢，想當年都喺一個交通樞紐嚟嫁。喺碼頭望出去水波泛泛，景物明淨，家長可以同小朋友行出去影翻張靚相留念。一路行過嚟，山河景色雖然不斷變化，但依然未見河嘅盡頭，為河岸景色增添咗一層神秘感。

 

喺碼頭上嘅縫隙有唔少招潮蟹，細心留意下可能仲會搵到彈塗魚。岸邊有唔少生物，小朋友好奇心旺盛，家長可以陪小朋友停低細心觀察下，對小朋友嚟講都好有樂趣嫁，仲可以培養小朋友嘅觀察力。

 

繼續前行，沿途會經過一個小石澗，去到分岔口跟往白普理方向行大概10分鐘。

 

大自然旅程風光

然後沿住斜路行出去就會見到一個開揚嘅位置，喺呢到山光水色，旁邊仲有幾隻小船隨水泛動，撫平心中嘅紛擾。望住呢個咁平和嘅景色，家長不妨同小朋友睇翻本繪本，享受親子閱讀嘅樂趣。

 

享受完大自然，原路離開。河嘅水位受潮汐漲退影響，翻去嘅路上又喺另一番景象，行嘅時候可以同子女一齊感受大自然嘅變化。

 

去發記士多前嘅巴士站就可以搭車離開。

 

北潭涌自然教育徑交通資訊

如果想嚟呢到嘅朋友可以，可以搭港鐵去到彩虹站，喺C2出口，乘搭96R巴士去到北潭涌總站落車。但喺96R只喺假日先會有車。

如果平日去嘅話可以喺彩虹搭站，喺C2出口，搭1A小巴去到西貢碼頭，轉乘7號小巴或者94號巴士，去到北潭涌總站落車。

停車場：北潭涌停車場

其他資訊

長度：3公里

時候：2小時