輕鬆遊梅窩銀礦瀑布仙境

想帶小朋友出去戶外郊遊，呼吸下新鮮空氣，但喺又想輕鬆啲咁睇下靚景？今次Jollymap有好介紹，位於梅窩嘅銀礦瀑布，路程絕大部分都喺平路，推住BB車都可以輕易咁去到瀑布，可以睇靚景之餘又唔太辛苦，絕對喺一家大細嘅假日好去處。

 

 

梅窩遊銀礦瀑布路線

以梅窩碼頭作為起點，喺碼頭出嚟之後右轉，沿住海濱行去銀礦灣觀景台，行嘅時候可以睇下呢個開闊無邊嘅大海，海風輕輕撫過面頰，相當愜意。

由銀礦灣觀景台行出嚟，行到銀礦灣渡假酒店前嘅路口就左轉，有唔少租單車嘅鋪頭，鐘意嘅話都可以租翻架單車踩入去銀礦瀑布。大家都可以喺附近去埋洗手間，或者喺士多補給下先再出發。

 

 

一路前行，跟住銀礦灣瀑布嘅指示行，去到離島自然歷史徑，路上都會見到唔少居民都喺踩單車出入。

歐陸風村屋

沿路仲會見到啲顏色鮮豔嘅村屋，家長都可以同小朋友影翻張相，唔講仲以為去咗歐陸小鎮咁。 

 

初踏白銀鄉

再行入去就會見到呢排整齊嘅村屋，穿過佢哋就會見到啲香蕉樹，上面掛住一梳梳香蕉，對於小朋友嚟講見到呢啲場景都幾有趣嫁。而旁邊就喺有成400年歷史嘅文武廟，因為起嚟喺用作請神明作證，為白銀鄉嘅村民公平咁仲裁開採銀礦時嘅爭執。

 

銀礦瀑布美景

行出白銀鄉嘅石門，左轉行多陣就去到銀礦瀑布。雨季嘅時候去，水量會比較充沛，瀑布嘅流水更加急勁，重重飛瀉，產生震耳欲聾嘅聲音，一眼就可以睇曬兩個瀑布，相當震撼。瀑布底下仲一個小水潭，夏天都會有家長同小朋友過嚟玩下水嫁。小朋友又可以喺石間上穿梭，玩個不亦樂乎。

銀礦洞探秘

睇完瀑布，有與趣嘅話都可以繼續行上山，行多5分鐘，就去到銀礦洞。以前村民就喺入面採白銀，後來因為礦石含銀量過低就停止生產啦，依家入口都起經封咗啦。大家可以洞口前面嘅涼亭抖翻陣，又或者喺呢個山明水秀嘅地方睇下繪本，相當寫意。不過呢段路比較斜，如果推BB車或者踩單車，就唔建議上嚟啦。

休息完，原路落山，翻到去奧運徑石碑嘅分岔口，沿左邊樓梯落去（圖片中嘅右邊），就會見到瀑布嘅下游。繼續行就會見到啲村屋同農田，大家可以靜靜咁欣賞周圍嘅景致，感受一下呢到嘅純樸嘅田園氣息。

親子梅窩遊樂區

行嘅話大概15分鐘就去到梅窩銀河花園，家長可以同小朋友入去玩下入場唔同嘅遊樂設施。既然一場嚟到梅窩，大家亦都可以行去出銀礦灣沙灘，玩下水，玩下沙，享受親子時光。

玩到累，仲可以去旁邊嘅渡假酒店，歎個下午茶先再走。最後，大家可以搭船或者巴士離開。

 

梅窩銀礦瀑布遊交通資訊

大家可以喺中環搭船過去梅窩，又或者喺東涌搭3m巴士過去，不過班次唔算太密。

其他資訊

長度：3公里

時間：2小時