玩轉大坳門

平時唔少行山人士鐘意去大坳門附近嘅龍蝦灣郊遊徑，但喺Jollymap今次介紹嘅喺清水灣郊野公園裡面嘅樹木研習徑。呢條行山徑相當輕鬆，而且四通八達，就算小朋友行行下想去洗手間都可以好快行翻出嚟。附近仲有各式各樣嘅郊遊設施，少行山嘅小朋友都唔怕悶親。

 

 

大坳門起點

搭巴士或者小巴去到大坳門嘅回旋處落車，由前面條斜坡行上去大概20分鐘就去到清水灣樹木研習徑嘅入口。雖然開頭有個斜坡，但喺後面大部分路都喺平路嚟，行嘅時候都會有陣陣嘅涼風吹過嚟，舒舒服服就行到去清水灣郊野公園。

清水灣郊野公園

行到入嚟，喺右手邊就會見到茶水亭，可以喺到買下補給品，或者買個風箏一陣上山玩。家長可以帶小朋友去茶水亭下面嘅洗手間，之後先再出發。

由茶水亭落去燒烤場，就會見到清水灣樹木研習徑嘅入口。一家大細可以喺到燒完烤，再去旁邊嘅樹木研習徑散散步，簡直喺完美。

清水灣樹木研習徑

喺研習徑嘅入口，就有樓梯可以行上去觀景台。喺觀景台可以遠眺青洲，同果洲群島。觀景台有清晰嘅標示，家長可以同小朋友一齊認識下眼前嘅小島叫咩名，認識香港嘅地理。旁邊仲有台凳，可以坐喺到慢慢欣賞眼前美景，望住白雲由小島上面慢慢飄過，同小朋友一齊享受慢生活，十分寫意，亦都不妨喺到睇翻本繪本，感受親子閱讀嘅樂趣。

由樓梯落翻嚟，就可以開啟學習之旅。沿住研習徑一直行都會有唔同嘅植物介紹牌，每個牌都有介紹到植物嘅特性，而且中英對照。例如紅楠，樹葉喺唔同嘅季節都會有唔同嘅轉變，家長可以同小朋友一齊發掘下植物喺當季嘅特徵。

大坳門放風箏

一直行到分岔口，就會見到有樓梯上去放風箏地點，上面有一大片草地，而且風勢都比較勁，小朋友可以放下風箏，又或者去涼亭休息下，睇下靚景都相當寫意。呢到可以清楚咁睇到前邊嘅橫瀾島、布袋澳等等……

睇完靚景原路落翻去，繼續前行可以睇到更多嘅植物介紹牌。喺後半段路，仲可以隱約咁睇到出面嘅景色，行嘅時後周不時都會有蝴蝶喺身邊飛過，令人感受到置身喺大自然嘅美好。

行翻出嚟就喺燒烤場。有興趣嘅話可以行埋去遊客中心，裡面擺放左唔同嘅岩石，旁邊仲有簡介，鐘意睇下唔同地質嘅小朋友不妨去睇下。

最後原路行翻落去落車嘅回旋位就可以搭巴士或者小巴離開嫁啦。

 

大坳門交通資訊

巴士：鑽石山91號

小巴：寶琳16、觀塘碼頭103、將軍澳103M

停車場：清水灣郊野公園旁邊有停車場，但位置不多

 

其他資訊

清水灣樹木研習徑：1.2公里（約30分鐘）

回旋處到清水灣郊野公園道路段：約1.5公里（約2小時）