鰂魚涌樹木研習徑 港島市區行山好去處

難得放假，想訓晏啲又想帶小朋友去行山？今次Jollymap推薦一條港島市區行山徑俾大家，就算遲咗起身都唔怕行唔切。雖然話香港喺石屎森林，其實有好多世外桃源就隱藏咗喺市區裡面。只要行多一點點，就可以回歸自然。

 

 

鰂魚涌樹木研習徑連接柏架山道同康怡花園，由太古地鐵站行過去都只需要10分鐘。沿途除咗有樹木介紹牌，仲會經過引水道、戰時古跡、自然教育中心，成程路都相當多嘢睇，啱曬嚟親子郊遊，小朋友玩嘅同時又學到生物同歷史知識。

 

鰂魚涌樹木研習徑路線

我哋由英皇道旁邊嘅基利路休憩處出發，沿住基利路一直向上行。

去到佛教中華康山學校，就會見到樹木研習徑嘅指示牌。由右邊嘅路行入去，好快就會聽到水聲，而且喺呢到開始一直行都會有綠樹遮蔭，有陽光嘅時候，樹影婆娑，行起上嚟相當舒服。

 

直到見到樓梯就可以上去大潭郊野公園啦，喺呢到就開始見到引水道嘅蹤影。前段路會沿住引水道行，喺落雨嘅時侯引水道有可能山洪暴發嫁，就算水位唔高都唔好行落去玩，行嘅時候都要注意安全。

 

認識植物種類

一直跟住條林蔭小道行，喺路上會見到唔少嘅植物介紹牌，有部分嘅樹上更加掛有名牌，更加方便小朋友辨認樹嘅種類。家長亦都可以講解下樹木對人類嘅重要性。例如樹木可以進行光合作用，吸入二氧化碳，釋出氧氣等等……

 

行到去第一個分岔口，右轉沿大風坳方向行。上去就會見到個晨運園地，一家大細可以喺到休息翻陣，玩下周圍嘅設施。一路行上嚟嘅時侯睇咗唔少朝氣蓬勃嘅植物，又呼吸咗唔少新鮮空氣。不妨喺呢到個鳥語花香嘅環境睇翻本繪本，小朋友都更加容易想像書中嘅畫面。

 

穿過晨運園地後，向柏架山道方向行，落樓梯就會見到個燒烤地點。

 

沿途美景

前面就有兩條小橋，喺橋上可以清楚睇到呢條綿延不斷嘅引水道，引水道兩邊嘅樹微微彎腰，好似喺到夾道歡迎由山上流落嚟嘅甘水。

 

企喺另一條小橋上仲可以睇到一個溪澗，潺潺流水，樹影斑駁，鶯啼燕語。能夠同子女一齊感受大自然嘅呢份美好，都喺人生一大樂事。家長亦都可以藉此引導小朋友要愛護同尊重大自然。

 

睇完就由前面嘅樓梯上去，呢段路有部分喺泥地，可能會有少少滑，行嘅時候要注意安全。

 

遊覽戰時古蹟

行到涼亭，我哋就由左邊樓梯上去，就會見到兩排整齊嘅野外爐灶。話說喺1938年，日軍佔領廣洲，香港就興建呢啲備戰設施。但喺香港喺戰事爆發18日後就失守，所以呢啲爐灶喺冇用過嘅。簡單嚟講，呢到就喺戰時嘅廚房，以前嘅人就喺用爐灶生火煮野食，唔似依家有煤氣爐咁方便。家長可以同小朋友講下以前嘅歷史、生活常識，教導小朋友要珍惜擁有嘅野，凡事唔喺必然嘅，亦都可以培養佢哋嘅自理能力。

 

穿過一排排嘅爐灶，右轉向柏架山道行多5分鐘，就會去到第二個軍隊遺跡。偶爾會聽到直升機或者喺飛機飛過嘅聲音，有種瞬間走入戰爭時代嘅錯覺，天空上面分分鐘投來炸彈，家長仲可以同小朋友嚟翻場激戰。

 

玩到累仲可以去旁邊嘅木架拉下筋，放鬆下。

 

由拉筋架旁邊嘅路口繼續行，就會見到個戰時嘅儲糧庫，不過就冇野外爐灶保存得咁好。

 

再行多大概十分鐘，就由研習徑出翻嚟啦。

 

林邊生物多樣性自然教育中心

沿斜坡行翻落去，途中會經過林邊屋。呢座建築物歷史悠久，喺1922年以紅磚建成，前身喺太古糖廠高級職員嘅宿舍，現時喺林邊生物多樣性自然教育中心。呢到唔止外形靚，裡面有唔同生態環境、植物、動物嘅介紹、仲擺放咗好多唔同嘅展品，例如生態調查嘅工具等等，非常值得帶小朋友入去參觀一下。唔單止可以學到香港生物嘅多樣性，仲可以提高大家自然保育嘅意識。走之前仲可以喺呢到去個洗手間。但喺要留意開放時間，逄星期二會休館(公眾假期除外)，農曆初一及二都唔會開放。

 

出翻嚟，落斜坡就翻到鬧市啦。

 

到英皇道右轉，行5分鐘就翻到起點啦。

 

鰂魚涌樹木研習徑交通資訊

港鐵：太古站，B出口，出嚟左轉行3分鐘就可以去到基利路休憩處

巴士：2、2A、77、81、99、102、106到惠安苑落車

停車場：富通中心停車場／匯豪峰停車場

 

其他資訊

長度：3公里

時間：2小時