馬鞍山親子遊 行山BBQ好去處

難得可以同小朋友一齊放假，想嚟個親子BBQ兼做下戶外活動，又驚假期搵唔到地方泊車？今次Jollymap為大家介紹一條泊車相當方便嘅家樂徑，馬鞍山家樂徑雖然只有0.44公里，但行到觀景台可以俯瞰新界第二高嘅山峰－馬鞍山，而且起點就喺燒烤場裡面，最啱就喺一家人BBQ完就行上去散下步，都喺一個非常唔錯嘅周未好去處。

 

馬鞍山之所以叫馬鞍山，唔喺因為呢到喺出產馬鞍，而喺因為馬鞍山有兩個山峰之間嘅弧線，睇落去好似馬鞍，就喺因此而得名。

馬鞍山闊落燒烤場

馬鞍山郊野公園嘅燒烤場相當闊落，小朋友喺到跑跑跳跳都冇問題，而且燒烤爐數量都唔少，咁就唔洗驚一場嚟到冇位BBQ。旁邊就有洗手間同停車場，洗野同拎野BBQ都好方便。

各式各樣遊樂設施

 

小朋友仲可以去玩下周圍唔同嘅健身設施，仲有一啲小動物造型嘅擺設俾小朋友騎下，活潑好動嘅小朋友可以喺到玩到不亦樂乎。

馬鞍山家樂徑路線

食到夠，玩到夠，行去洗手間果邊就會見到馬鞍山家樂徑嘅入口。雖然話馬鞍山有成702米，但已經身處喺燒烤場，又唔洗真係行曬上去702米咁高，只要行到去小山丘都可以睇到靚景。而且喺沿樓梯行上去嘅時候，一路都會有啲植物介紹牌睇下，呢到仲林蔭處處，行起上嚟都幾舒服嫁，大概20分鐘就會去到小山丘啦。大部分嘅路段都喺完好嘅樓梯嚟，行起上嚟唔算太辛苦。

馬鞍山山腰美景

上到小山丘，可以望望靚景，向左望就喺沙田城門河，向右望就喺吐露港，向下望就喺馬鞍山，向上望周睇到藍天白雲，偶爾仲聽到飛機聲，真喺360度零死角嘅靚景。家長可以同小朋友一齊睇下景觀嘅介紹牌，搵下圖片上嘅景點，都喺一個唔錯嘅親子互動嚟嫁，仲可以認識香港嘅地理，又冇齋睇文字咁悶。

睇到夠，玩到夠，樂得清閒，家長亦不妨同小朋友一齊睇翻本繪本，沉澱思緒。

沿住樓梯落山，大概5分鐘就去到另一個觀景台。雖然冇上面嘅觀景台咁高，但喺呢到更加開揚，冇樹木嘅阻擋。可以從另一角度欣賞對岸嘅景色，又喺另一翻感受。

一路跟住樓梯落去，好快就翻到燒烤場，休息翻陣就可以離開啦。

如果想行路翻去馬鞍山港鐵站，可以由燒烤場出面嘅馬鞍山村路向新港城方向落山，行大概30分鐘，喺右手邊就會見到港鐵站嘅指示牌，只要跟住佢就可以翻到馬鞍山港鐵站啦。

 

馬鞍山家樂徑交通資訊

NR84村巴

大家可以搭港鐵去到馬鞍山站，由B出口新港城商場行落去巴士總站，喺近馬路旁邊就會搵到NR84村巴，搭到去馬鞍山郊野公園落車，不過村巴嘅班次比較疏，記得要睇咗時間表先好出門啦。

步行

大家亦可以選擇由馬鞍山港鐵站，由B出口出嚟，經天橋行到去馬鞍山路嘅馬鞍山分區警署，然後右轉向恆安方向行到保良局莊啟程小學，過馬路，由雅景臺1座旁邊嘅樓梯行上去馬鞍山村路，一路向馬鞍山村方向上斜，行大概30分鐘就去到馬鞍山郊野公園。

 

停車場

自駕人士就比較方便，馬鞍山郊野公園旁邊有空地俾大家泊車。

 

長度：0.44公里

時間：1小時