太平山悠遊行

平時上太平山山頂，不外乎去下凌霄閣、行下山頂廣場。通常都喺游客去嘅地方。Jollymap又點會咁行阿，今次帶大家去行山頂嘅環迴步行徑，發掘被遺漏嘅景點。山頂環迴步行徑由盧吉道同夏力道環山徑組成，全程路徑平坦，大部分路段都有大樹遮蔭，輕鬆易行，家長可以帶埋BB車嚟，環山而行，親親大自然。

 

 

纜車體驗

所謂條條大路通羅馬，去山頂都一樣嫁姐。今次就帶大家搭纜車上去太平山山頂。山頂纜車已經有一百三十年歷史，想當年都只為居住喺山頂上的香港總督同名流紳士提供服務，不過現時已經成為咗旅遊必到景點。纜車上山時最大斜度可以超過25度，家長同小朋友可以舒舒服服坐喺纜車，欣賞山下嘅景緻。對小朋友嚟講都喺一個新奇有趣嘅體驗。

踏出纜車就已經身處喺凌霄閣，有需要嘅話可以喺到準備些少補給，去埋個洗手間，先再出發。 

 

踏足盧吉道

由凌霄閣出嚟，右手邊有三條分岔路，最右邊果條就喺盧吉道入口。

唔好以為入口就冇野睇阿，盧吉道1號其實喺山頂纜車公司辦事處，雖然好似新簇簇，但其實已經有過百年歷史，現時喺香港二級歷史建築。

一直沿盧吉道行，林蔭滿道，綠意盎然，相當舒服寫意。一路上都有路牌介紹沿途嘅植物生態，例如蝴蝶、秀柱花、珊瑚樹等等… 而旁邊就係介紹嘅植物，睇完詳盡嘅介紹，小朋友可以駐足近距離觀賞，既可以增加佢地對大自然嘅認識，又可以加深對生態植物嘅印象。

百年歷史痕跡

盧吉道有部分路段更加已經有過百年歷史，喺路上偶爾會見到幾張百年石凳。據聞有張更加喺以前港督坐過。如果有需要的話，不妨喺石凳上飲啖水休息陣。石凳原先嘅設計喺俾人坐喺到欣賞維港景色，由於已經有百年歷史，部分石凳嘅景觀被叢林遮蔽，不過都仍然有部分喺可以俯瞰到維港景緻。

如果想去個更加開揚嘅位置飽覽維港美景，再向前行就可去到盧吉道觀景台。由起點行過嚟都喺大概需時30分鐘。呢個位冇樹林阻擋視線，企喺上面簡直有種大地在我腳下嘅感覺，所以有好多攝影愛好者都會選擇嚟呢到捕捉香港嘅繁榮景象。

欣賞完城市嘅美態，繼續出發去欣賞大自然嘅鬼斧神工。途中有棵根深葉茂嘅印度橡樹，佢喺用氣根吸收水氣，生長得非常迅速，樹嘅氣根形成一道拱門，相當之有氣勢。

步行徑交叉點

穿過竹林，就去到盧吉道同夏力道環山徑嘅交界－高西郊遊區，可以入去歐陸式休憩公園嘅涼亭坐翻陣，感受一下大自然嘅氣息，附近仲設有洗手間，同健身公園。

呢到其實都喺個分岔口嚟，如果時間同體力許可，可以沿克頓道行去龍虎山睇埋松林炮台。不過大部份路段要上落樓梯，推住BB車嘅家長就要注意啦。大家亦都可以選擇沿夏力道行返去凌霄閣。

歷史遺跡－松林炮台

松林炮台處海拔307米，喺香港炮台之冠。有興趣去睇埋呢個景點嘅朋友可以喺分岔路轉向克頓道，跟住松林廢堡嘅指示牌，行到燒烤場，由右邊樓梯落去就到達廢堡啦。 

附近有片草地，仲有涼亭同洗手間，有需要可以抖抖先。不過沿住斜路行5分鐘就去到松林炮台啦。日軍侵港期間，松林炮台受到嚴重破壞，最後守軍被逼撤離炮台。直到現時，呢到嘅炮床、指揮台都仍然保留得相當完整。家長可以喺松林廢堡歷史徑同小朋友一齊閱讀下炮台歷史嘅解說牌，亦可以喺到周圍探索下。參觀完炮台就可以原路折返到高西郊遊區，向夏力道行。

 

夏力道環迴徑

夏力道長約一公里，較盧吉道短，喺條輕鬆嘅步行徑。不過由於附近有住宅，間唔時都會有小型車輛出入，行嘅時候就要注意啦。沿路都可以留意下路邊嘅特色街燈。去到尾段仲會有瀑布，溪澗源自山頂公園，觀賞完瀑布行5至10分鐘就可以返到去凌霄閣啦。

探索完大自然，不妨喺落山嘅時候同小朋友睇翻本繪本，加深記憶，都喺一種好好嘅學習方法嚟嫁。

 

山頂環迴步行徑交通資訊

港鐵：中環站，J2出口，穿過遮打花園，跟住指示牌前往纜車站

巴士：中環8碼頭搭乘15C號巴士到花園道山頂纜車站

中環交易廣場巴士總站，搭乘15號新巴，直接去到山頂廣場

小巴：1號綠色小巴

停車場：山頂廣場停車場

 

其他資訊

長度：約3.5公里 (不包括龍虎山路段)

時間：約3小時